އަދަބީ ބަސް

މިއީ ދިވެހިންގެ ތެރެއިން މިހާރު ނެތެމުންދާ އަދަބީ ބާވަތެއް ކަމަށްވާ އަދަބީ ބަސް ދިރުވާ އާލާކޮށް ދަރިވަރުންގެ ހިތްތަކުގައި އަދަބީ ބަހާއިމެދު ލޯބި އުފެއްދުމުގެ ބޭނުމުގައި ހިމަނާލެވިފައިވާ ބައެކެވެ. މިބައިގައި ދިވެހިން އާއްމުކޮށް އުޅޭ އަދަބީ ރީތި ބަސްތައް ހިމަނާލެވިފައިވާނެއެވެ.

 ********************************************************

އަޑިގަނޑަކަށްފަހު އުސްގަނޑެއް އަންނާނެއެވެ.

މާނަ އަކީ، ތިމާއަށް ލިބޭ މިންވަރަށް ވުރެ ބޮޑަށް ޚަރަދުކުރަން ނޫޅޭށެވެ. އޭރުން ތިމާ ދަރައިވިކޭނީއެވެ.

ކައްޗަށް އެޅި ބިންގަލެއް ކެއްޗާ ހަމަޔަށް ނެންގަސް އޮންނާނީ ކައްޗަށެވެ.

އިމާރާތެއްގެ ބިންގަލެއް ކައްޗަށް އެޅިއްޖެނަމަ ކިތަންމެ މައްޗަށް ނެގިޔަސް އެއިމާރާތެއް ހުންނާނީ ކައްޗަށެވެ. ނުބައިގޮތަކަށް ފެށިއްޖެކަމެއް ކިތަންމެ ބޮޑުވެގެންދިޔަސް އެކަމެއް އޮންނާނީ ނުބައިކޮށެވެ. މިއެވެ. ނުބައި ތަރުބިއްޔަތެއް ކުއްޖަކަށް ދެވުނަސް މިކަންވާނީ މިހެންނެވެ.

ނުފޯރާ ފޮތިން ފޫނުގަޅާށެވެ.

މާނަ އަކީ، ތިމާއަށް ލިބޭ މިންވަރަށް ވުރެ ބޮޑަށް ޚަރަދުކުރަން ނޫޅޭށެވެ. އޭރުން ތިމާ ދަރައިވިކޭނީއެވެ.

ނަރެއްހާ ތަން ދޫކޮށްލިއްޔާ ކެނބެއްހާ ތަން ދަމައިގަންނާނެ އެވެ.

މިތާގައި ނަރެކޭ މި ބުނެވުނީ ބޮނބިނަރަކަށެވެ. ކެނބޭ މި ބުނެވެނީ އޮޑި ފަހަރު އަޅަންގެންގުޅޭ އެންމެ ފަލަ ވަލަށެވެ. މާނަ އަކީ، ކިތަންމެ ކުޑަ ތަންކޮޅެއް އަތުން ދޫކުރެވުނަސް، އެ ދޫވީ ހީކުރެވޭ ވަރަށް ވުރެ މާ ބޮޑު ތަނެކެވެ. އެ ބައި އަލުން އަތުލާން ދަތިވާނެއެވެ.

ހިޔަންޏަށް މުޑި ނުނަގާށެވެ.

ބައެއް މޮޔަ ޖަނަވާރު އެ ސޮރުމެންގެ އަމިއްލަ ހިޔަންޏަށް ހަމަލާދީ އުޅޭކަމަށް ބައެއް ވާހަކައިގައި ކިޔާ ހަދައެވެ. މި މިސާލު ނުވަތަ މި ބަސް އުފެދިފައިވަނީ އެ ގޮތުން ކަމަށް ލަފާކުރެވެއެވެ.
ނަމަވެސް، މި ބުނުމުގެ މާނައަކީ، ކަމަކަށް ނުވާ ކަހަލަ ކަންކަމާމެދު ބިރުނުގަންނާށެވެ. ނުވަތަ އެއްވެސް ޙަޤީޤަތެއް ނެތް ކަންކަމާ ޖެހިލުން ނުވާށެވެ.

ބަސްނުވިކޭ އޮޑީގެ ދިރުނބާކޮޅަށް ނާރާށެވެ.

ކޮންމެ އޮޑިއެއްވެސް ތިލަ ތަންތަނުން ދަތުރުކޮށްފައި ދާއިރު “ގަލަށްކިއާން” މީހަކު ހުންނާނެއެވެ. ގަލަށް ކިއުމަކީ ތިލަ ގާގަލުން އޮޑި ނައްޓަމުން ހުންގާނުގައި ހުންނަ މީހާއަށް އޮޑި ނުބީހި ދެވޭން އޮންނަ މަގު ކިޔައިދިނުމެވެ. އޮޑީގެ އެންމެ ޚާއްޞަކޮށް ހުންގާނުގައި ހުންނަމީހާ އޭނާ ބުނާ އެއްޗަކަށް ކަމޭހިތަން ޖެހޭނެއެވެ. މިހެން ނުހެދިއްޖެނަމަ ކޮންމެފަދަ ދެރަގޮތެއްވެސް ވެދާނެއެވެ. މިހެނީ އެ ނުރައްކާތެރި ވަގުތުގައި އޭނާއަކީ އެއޮޑީގައިހުރި އެންމެ މުހިންމު މީހާއެވެ. މިފަދަ މީހެއްގެ ބަސް ނުވިކޭގޮތް (ބަސްކަމުނުދާގޮތް) ވެއްޖެނަމަ އެއޮޑިއެއް ފަރަކަށް ތާކަށް އަރައި ހަލާކުވުން އެކަށީގެންވެއެވެ. މިހެން ބުނެއުޅެނީ އަމުރު ކުރަންޖެހޭ ކަހަލަ މަޤާމެއްގައި ހުންނަން ޖެހިފައި ތިމާގެ އަމުރު އެއްވެސް އެއްޗަކަށް ނުވާކަހަލަ ގޮތްގޮތް މެދުވެރިވާ މީހުންނާއި މެދުގައެވެ. މިކަހަލަ ގޮތަކަށް މަތީ މަޤާމެއްގައި ހުރުމުގެ ނުރައްކަލަށްޓަކައި ޅެންވެރިޔާ ކިއުއްވާފައިވަނީ:- “ބަސްވިކިނުއުޅޭ އޮޑިއަކު ދިރުނބާކޮޅަކަށްވާ އަސްތާ ކުރިމަތި ބެލުމަށަ ހީކޮށް ނުއަރާނދޭ” މިހެންނެވެ.